Titanic-fiðla fer fyrir metfé

Fiðlan, sú hin sama og leikið var á þegar Titanic sökk, var seld í dag á uppboði og fór fiðlan á rúmar 175 milljónir króna.  Þetta mun vera met fyrir minjagripi sem tengjast þessum frægasta skipskaða sögunnar.

Hljómsveitarstjórinn Wallace Hartley spilaði á fiðluna og reyndi með því að róa farþegana eftir að skipið rakst á borgarísjaka í Norður-Atlantshafinu í apríl árið 1912 á leið frá Southampton til New York.

Hartley spilaði sálminn Hærra minn Guð, til þín á meðan farþegarnir príluðu í björgunarbáta. Hartley og sjö meðlimir hljómsveitarinnar fórust allir en þeir kusu að spila áfram. Meira en 1,500 fórust þegar skipið sökk. Þegar lík Hartley´s fannst meira en tíu dögum eftir slysið fannst fiðlan í leðurkassa, tjóðruð við lík hans; eða svo segir sagan.