Bashar al-Assad segir taka langan tíma að eyða efnavopnunum

Bashar al-Assad, forseti Sýrlands segist viljugur til þess að eyða öllum efnavopnum úr vopnabúrum Sýrlandshers eins og lagt hefur verið til. Hann varar þó við því að verkið gæti tekið allt upp í ár.

Þetta kom fram í viðtali sem Fox News fréttastöðin tók við forsetann en þar þvertók al-Assad enn og aftur fyrir að her hans hafi komið að efnavopnaárásinni í úthverfi Damaskus á dögunum þar sem hundruð féllu.

Vesturveldin og Rússar hafa kallað eftir því að Sýrlendingar eyði vopnunum. Bandaríkjamenn vilja að Sameinuðu þjóðirnar samþykki ályktun þess efnis og að í henni verði því hótað að Sýrlendingar verði beittir hervaldi standi þeir ekki við samkomulagið. Rússar hafa sett sig upp á móti því að ganga svo langt í ályktuninni.