Stórleikstjóri styður Náttúruverndarsamtök Íslands

„Hann vildi ekki gefa það upp hvað þetta var mikið, en þetta er kærkominn stuðningur, og ekki síst sú áminning að Ísland er einstakt og hér er mikið af dýrmætum svæðum sem við verðum að vernda,“ segir Árni Finnsson, formaður Náttúruverndarsamtaka Íslands en leikstjórinn Darren Aronofsky lagði til fjármagn til þess að styrkja samtökin og náttúruvernd á Íslandi.

Það er Aronofsky sjálfur sem vill ekki að upphæðin verði gefin gerð opinber en tilkynnt var um fjárframlag hans á blaðamannafundi fyrr í dag en leikstjórinn er staddur hér á landi þessa dagana.

Ástæðan fyrir því að leikstjórinn ákvað að styðja við bakið á samtökunum er sú að hann vildi meðal annars vega upp á móti náttúruraski sem varð við upptökur á stórmyndinni Noah hér á landi síðasta sumar.

Leikstjórinn kom raunar hingað til lands fyrir fimmtán árum síðan og segir Árni að þá fyrst hafi hugmyndin um Noah fæðst í huga leikstjórans.

Aronofsky hefur verið afar virkur í náttúruvernd síðustu ár að sögn Árna og málefnið honum hugleikið. Hann segir stuðning leikstjórans mikilvægan, „og ekki bara út frá krónum og aurum, heldur er þetta ákveðin viðurkenning,“ segir Árni.

Hann segir féð verða nýtt til þess að fjölga félögum í samtökunum auk þess sem til stendur að prenta og dreifa bæklingum til ferðamanna um náttúru Íslands og stöðu hennar. 

Aronofsky er einn eftirsóttasti leikstjóri veraldar. kvikmynd hans, Black Swan, fékk óskarsverðlaun fyrir bestan leik í aðalhlutverki, og myndir hans Requim for a dream  og Pí, eru fyrir löngu orðnar goðsagnakenndar í kvikmyndaheiminum.

Kvikmyndin Noah verður ekki frumsýnd fyrr en í mars á næsta ári.