Hundur gaf ketti blóð

Hinar hefðbundnu erjur á milli hunda og katta voru lagðar til hliðar í Nýja-Sjálandi á dögunum þegar labradorhundurinn Macy gaf blóð svo hægt væri að bjarga lífi fresskattarins Rory. Kötturinn hafði fengið blóðeitrun og fór eigandinn með hann á dýraspítalann þar sem ljóst var að hann þyrfti blóðgjöf hið snarasta.

Enginn tími var til að athuga blóðflokk kattarins en hundurinn Macy var til taks og ákvað dýralæknirinn að taka sénsinn, vitandi að kötturinn myndi hvort eð er gefa upp öndina, fengi hann ekki blóð. Tilraunin heppnaðist vel og Rory er á góðu róli, með hundablóð í æðum.