Hár úr nagdýrum í tómatsósu

Heilbrigðisyfirvöld í Brasilíu hafa innkallað sendingu af Heinz-tómatsósu framleiddri í Mexíkó vegna þess að í henni fundust nagdýrahár.

Öll sala og dreifing á tómatsósunni hefur verið bönnuð og hafa yfirvöld í Mexíkó hafið rannsókn á verksmiðjunni sem framleiðir hana.

Að sögn Heinz var sendingin flutt til Brasilíu í fyrra en hafði verið tekin úr dreifingu. Fyrirtækið segir allar vörur sínar framleiddar samkvæmt alþjóðlegum hreinlætisstöðlum og lofar því að málið verði rannsakað.

Hvorki Heinz né brasilísk yfirvöld hafa upplýst um það hversu mikið magn af hári fannst í sósunni eða hve stór sendingin var.

Nathan & Olsen er innflutningsaðili Heinz á Íslandi og er sú Heinz-tómatsósa sem er í sölu í verslunum hér á landi ekki framleidd í Mexíkó. Hún hefur síðan árið 2010 komið frá Hollandi þar sem hún er framleidd.