Sýrlandsstjórn fellst á rannsókn í Arbin

Sendinefnd rannsóknarmanna frá Sameinuðu þjóðunum bíður nú í Damaskus eftir leyfi til að komast inn á vettvang efnavopnaárásarinnar sem gerð var í einu úthverfa borgarinnar og kostaði hundruð manna lífið á miðvikudaginn í síðustu viku.

Líkurnar á inngripum Vesturlanda virðast aukast með hverjum deginum, en viðbrögð Vesturlanda ráðast væntanlega af því hver niðurstaðan af rannsókninni verður.

Yfirmenn herafla Bandaríkjanna, Bretlands, Frakklands, Þýskalands, Ítalíu, Tyrklands, Kanada, Sádi-Arabíu og Jórdaníu hittust í Jórdaníu í gær til að fara yfir stöðuna. Meðal þess sem hefur komið til skoðunar er að gera loftárásir með svipuðum hætti og gert var í Kosovostríðinu.

Sýrlandsstjórn hótar hins vegar hörðum viðbrögðum, grípi Vesturlönd til þess ráðs að gera árásir á Sýrland.

Stjórnvöld í Bandaríkjunum, Bretlandi, Frakklandi og fleiri Vesturlöndum segja lítinn vafa leika á, að efnavopnaárásárás hafi verið gerð í síðustu viku, og flest þessi ríki reikna með því að Sýrlandsstjórn beri ábyrgð á henni.

Að sögn hjálparstofnana voru um 3.600 manns fluttir á þrjú sjúkrahús í Damaskus og nágrenni á miðvikudag með einkenni eitrunar. Rúmlega 350 þeirra eru látnir.

Sýrlandsstjórn þvertekur fyrir það að bera ábyrgð á árásinni, en sakar þess í stað uppreisnarmenn um voðaverkin. Sýrlandsstjórn segir að uppreisnarmenn með bækistöðvar í Jobar í úthverfi Damaskus hafi notað efnavopnin.

Rússar hafa reynt að fá Sýrlandsstjórn til að samþykkja rannsókn, en telja að frekar strandi á uppreisnarmönnum sem ekki láta af bardögum til að tryggja efnavopnaeftirliti Sameinuðu þjóðanna örugga leið inn á vettvang árásarinnar.

Sýrlenska ríkisfréttastofan Sana fullyrti svo í gær að Sameinuðu þjóðirnar hafi náð samningum við Sýrlandsstjórn um að sendinefndin fái leyfi til að rannsaka ummerki á vettvangi. Ekki er þó vitað hvenær leyfið fæst.

Harðir bardagar hafa geisað í austanverðum úthverfum Damaskus undanfarna daga. Uppreisnarmenn hafa þessi hverfi að hluta á sínu valdi, en stjórnarherinn reynir að ná þeim úr höndum þeirra.