Skotið á bíl Sameinuðu þjóðanna í Sýrlandi

Talsmaður Sameinuðu þjóðanna segir að skotið hafi verið á bifreið vopnaeftirlitsmanna, sem voru á leiðinni á vettvang efnavopnaárásarinnar í útjaðri Damaskusborgar.

Martin Nesirky, sem er talsmaður Ban Ki-moons aðalritara, segir að leyniskyttur hafi skotið margoft á bifreiðina á hlutlausu svæði, sem er á milli yfirráðasvæðis stjórnarhersins og yfirráðasvæðis uppreisnarmanna.

Hann segir að vopnaeftirlitið ætli að halda áfram starfi sínu og fara á staðinn strax og ný bifreið verður fengin. 

Hundruð manna létu lífið af völdum efnavopnaárásar í útjaðri Damaskus á á miðvikudaginn í síðustu viku. 

Uppreisnarmenn segja stjórnarherinn bera ábyrgð á árásinni, en Sýrlandsstjórn vísar því á bug og segir uppreisnarmenn hafa staðið að henni.

Stjórnvöld víða á Vesturlöndum hafa sagt allt benda til þess að stjórnarherinn sé sökudólgurinn, en vonast er til að rannsókn sendinefndar Sameinuðu þjóðanna geti skorið úr um það.