Fjórtán ára með líkama 110 ára

Fjórtán ára drengur í Indlandi, Ali Hussain, er með líkama eins og 110 ára gamall maður. Hann er haldinn sjaldgæfum sjúkdómi sem veldur því að líkami drengsins eldist átta sinnum hraðar en eðlilegt er. Daily Mail fjallaði um Ali í dag.

Sjúkdómurinn ber nafnið Progeria og er aðeins þekktur hjá um 80 manns í heiminum. Sjúkdómurinn veldur hrörnun á augum, hjartasjúkdómum og Ali hefur einnig misst hárið.

Fimm systkini Ali hafa látist af völdum sjúkdómsins, tveir bræður og þrjár systur. Yfirleitt lifa þeir sem eru með þennan sjúkdóm ekki lengur en til fjórtán ára og því þykir kraftaverk að Ali sé enn á lífi. Tvær systur Ali eru ekki haldnar sjúkdóminum.

Ali segist ekki vera hræddur við að deyja en segir að foreldrar hans hafi þurft að þola nóg og vonar að hann komi til með að lifa lengur en þau. Hann vonar að það finnist lækning við sjúkdómnum.