Draugur Blairs á breska þinginu

Draugur Tony Blairs, fyrrverandi forsætisráðherra Bretlands, hefur svifið yfir þingsalnum í London í dag.

Þingmenn hafa í allan dag rætt hugsanlegar hernaðaraðgerðir gegn Sýrlandi vegna efnavopnaárásarinnar, sem gerð var í síðustu viku í úthverfum Damaskusborgar.

Þingmenn hafa verið tregir til að samþykkja tillögu frá David Cameron forsætisráðherra um heimild til aðgerða, og segja ekki hafa fengið fullnægjandi upplýsingar í málinu.

Vísuðu þingmenn óspart til aðdraganda Írakstríðsins árið 2003, þegar Blair fékk þingið til þess að samþykkja þátttöku í hernaði gegn Saddam Hussein, án þess að fullnægjandi upplýsingar lægju fyrir.

Flýtimeðferð þingsins, sem Cameron óskaði eftir, var hafnað strax í morgun vegna andstöðu Verkamannaflokksins.

Cameron lagði mikla áherslu á það í morgun að breska þingið samþykkti að heimila breska hernum að taka þátt í aðgerðum gegn Sýrlandsstjórn.

Hann lagði fram rökstuðning fyrir því að Bretar geti gert þetta án umboðs frá öryggisráðherra Sameinuðu þjóðanna, ef árásir eru gerðar í „mannúðarskyni“, það er að segja með það eitt í huga að koma í veg fyrir að sýrlensk stjórnvöld verði fleiri almennum borgurum að bana.

Vísaði hann þar til ályktunar öryggisráðs Sameinuðu þjóðanna frá 2006, númer 1674, þar sem heimild til slíks sé að finna.

Jafnframt lagði hann fram minnisblað frá leyniþjónustumönnum, sem fullyrtu að allar líkur væru til þess að Sýrlandsstjórn beri ábyrgð á efnavopnaárásinni.

Alistair Hay, breskur efnavopnafræðingur, segir hins vegar fátt um óyggjandi staðreyndir í þessu minnisblaði: „Þetta snýst meira um ‚trúið okkur og sérfræðingunum okkar’,” er haft eftir honum á vefsíðu breska dagblaðsins The Guardian.

Í minnisblaðinu segir að Sýrlandsstjórn hafi að minnsta kosti fjórtán sinnum áður notað efnavopn. Hins vegar sé nokkuð öruggt að uppreisnarmenn ráði ekki yfir getu til að nota efnavopn.

Sérfræðingar frá Sameinuðu þjóðunum hafa undanfarna daga verið að rannsaka vettvang árásanna, en búist er við að rannsókn þeirra ljúki á næstu dögum.

Ban Ki moon, framkvæmdastjóri Sameinuðu þjóðanna, segist reikna með að fá skýrslu með niðurstöðum rannsóknarteymisins strax á laugardaginn.

Bashar al Assad Sýrlandsforseti ítrekaði í gær að öllum árásum verði svarað og vísar á bug öllum ásökunum um notkun efnavopna.