Nasisti fæst ekki jarðsunginn

Kaþólska kirkjan í Róm harðneitar að taka þátt í að jarðsyngja og grafa þýska nasistann Erich Priebke, sem lést í stofufangelsi þar í borg á föstudaginn.

Borgarstjórinn í Róm, lögreglustjórinn í Róm og nánasti aðstoðarmaður Frans páfa hafa allir staðfest þessa afstöðu.

Priebke varð hundrað ára fyrr á þessu ári en hann var dæmdur í ævilangt fangelsi árið 1996 fyrir aðild sína að fjöldamorðum þýskra nasista í Ardeatíne-hellunum í Róm. Dóminn hefur hann afplánað í stofufangelsi heima hjá lögmanni sínum, Paolo Giachini.

Kirkjan hefur sagt að Giachini verði sjálfur að sjá um útförina og halda hana á heimili sínu. Lögmaðurinn hefur krafist þess að Priebke fái kirkjulega útför.

Priebke hafði verið á flótta í nærri hálfa öld þegar hann var loks framseldur til Ítalíu frá Argentínu. Fjöldamorðin í Róm þann 24. mars árið 1944 eru ein þau verstu í sögu þýska hernámsins á Ítalíu. Alls voru 335 menn og drengir teknir af lífi fyrir að hafa tekið þátt í árásum ítalskra andspyrnumanna á þýska hermenn.