Börðu hermann úr síðari heimsstyrjöldinni til bana

Lögreglan í borginni Spokane í Washington-fylki í Bandaríkjunum hefur handtekið tvo unglinga á aldrinum 16 til 19 ára sem eru grunaðir um að hafa barið 88 ára gamlan eftirlaunaþega og fyrrum hermann bandaríska hersins.

Lögreglumenn fundu manninn, sem hét Delbert Belton og barðist meðal annars í síðari heimsstyrjöldinni, með alvarlega höfuðáverka á miðvikudag og lést hann á sjúkrahúsi daginn eftir.

Svo virðist sem árásarmennirnir hafi valið Belton af handahófi þar sem hann sat einn í bílnum sínum. Lögreglan í Spokane hefur undir höndum upptöku úr öryggismyndavél sem sýnir árásarmennina.