Ævilangt fangelsi fyrir fjöldamorð í Afganistan

Bandaríski hermaðurinn Robert Bales, sem myrti 16 manns í litlu afgönsku þorpi í mars á síðasta ári, hefur verið dæmdur í lífstíðarfangelsi af herdómstól í Bandaríkjunum.

Hann fór einn síns liðs út úr herbúðunum að næturlagi og inn á nokkur heimili í nálægu þorpi þar sem hann skaut á alla, sem á vegi hans urðu, konur og börn jafnt sem karla.

Við réttarhöldin játaði hann morðin, lýsti ítarlega því sem gerðist og baðst loks afsökunar á „heigulskapnum” eins og hann kallaði verknað sinn. Ekkert benti til annars en hann hafi gert sér fulla grein fyrir því sem hann var að gera.

Verjandi hans las við réttarhöldin upp úr bréfi frá félögum hans í hernum, þar sem segir að hann hafi verið orðinn heltekinn af sálarmyrkri eftir að hafa í áratug horft upp á félaga sína drepna og limlesta hvern á fætur öðrum.

Dómarinn tók tillit til þessa og gaf honum kost á náðun eftir tuttugu ár.

Nokkrir ættingjar þeirra, sem hann myrti, báru vitni við réttarhöldin. Einn þeirra er Haj Múhamed Wazir, sem missti ellefu manns úr fjölskyldu sinni, þar á meðal móður sína, eiginkonu og sex af sjö börnum.