Transkona lést eftir fólskulega árás í Harlem

Transkona sem varð fyrir fólskulegri líkamsárás í Harlem-hverfi New York-borgar um síðustu helgi lést af sárum sínum í gær. Málið er í rannsókn og talið er að um hatursglæp sé að ræða.

Hin 21 árs gamla Islan Nettles var á rölti með nokkrum öðrum transkonum rétt fyrir miðnætti á laugardag þegar hópur manna réðust að þeim með hrópum og köllum, slógu þær og svívirtu.

Slökkt var á öndunarvélum Nettles á spítala í Harlem í gær eftir að ljóst var að starfsemi heilans væri engin eftir árásina.

Tvítugur karlmaður hefur verið handtekinn vegna árásarinnar og var í fyrstu ákærður fyrir vægustu tegund líkamsárásar, en búist er við því að í kjölfar dauða Nettles verði því breytt.