Klessti á kýr á fleygiferð

Ung kona frá Bandaríkjunum að nafni Amanda Roden var að skemmta sér við að þjóta niður fáfarinn veg í Washington ríki í Bandaríkjunum á löngu hjólabretti (Longboard). Skemmtiferð þessi endaði þó ekki vel þar sem Amanda lenti í árekstri við tvær kýr sem voru á veginum.

Huffington Post hefur eftir Amöndu að hún hafi verið á um 45-60 kílómetra hraða og hún hafi ekki séð þær kýrnar nægilega snemma. „Þá var ég að fara að lenda á þeim. Mér fannst of áhættusamt að reyna að komast fram hjá þeim ef ein þeirra skyldi ýta mér út af veginum, þar sem fallið væri mikið og í grjóti. Þannig að setti höfuðið fyrir mig og vonaði það besta,“ segir Amanda.

Hún lenti utan í kú og skall svo á aðra. Þá féll myndavél hennar af henni, buxurnar hennar rifnuðu mikið og hún fékk klauflaga mar á lærið og ör á annan handlegginn. „Eftir þetta héldu kýrnar sér frá veginum og þær bauluðu reiðilega þegar þær hlupu í burtu.“

Amanda tók salibununa upp á myndband sem hægt er að sjá hér að neðan.