Rodgers treystir á Leiva og Allen

Brendan Rodgers, stjóri Liverpool, hefur fulla trú á því að þeir Lucas Leiva og Joe Allen geti fyllt í skarðið sem Steven Gerrard skilur eftir sig.

Gerrard meiddist í leik liðsins gegn West Ham um helgina og verður frá næstu sex vikurnar. Þar að auki er Jordan Henderson tæpur eftir að hafa meiðst á ökkla í sama leik.

„Steven er afar mikilvægur leikmaður fyrir okkur en við erum með aðra leikmenn sem verða að stíga upp,“ sagði Rodgers við enska fjölmiðla.

„Lucas hefur verið frábær og til marks um það hefur hann unnið sér inn sæti í brasilíska landsliðinu. Hann hefur því gæðin og reynsluna til að taka á sig ábyrgðarhlutverk í liðinu.“

„Joe hefur litið mjög vel út - með góðar hreyfingar og vinnur vel. Það er eitthvað sem við þurfum til að halda boltanum og byggja upp okkar leik.“