Þessir stuðningsmenn mega deyja sem fyrst

Eigandi Hull City, Assem Allam, ætlar ekki að hlusta á stuðningsmenn félagsins því hann hefur formlega sótt um að fá að breyta nafni félagsins í Hull Tigers frá og með næstu leiktíð.

Hull City var stofnað árið 1904 og stuðningsmenn félagsins eru alls ekki hrifnir af því að nafni félagsins sé breytt. Allam segir að nafnabreytingin muni skila félaginu meiri tekjum.

Félagið tapaði 28 milljónum punda á síðustu leiktíð og Allam er eðlilega allt annað en sáttur við það.

"Ég veit að þetta mun skipta máli. Styttri nöfn slá frekar í gegn. Þetta er grundvallarmarkaðsfræði. Hull skiptir máli en City skiptir engu máli. Tigers: Það er ekki hægt að sleppa tákni krafts," sagði Allam.

"Ég get ekki haldið áfram að kasta peningum á glæ. Við viljum að félagið standi undir sér og að það sé þekkt út um allan heim eins og Man. Utd."

Þeir stuðningsmenn sem hvað hart berjast gegn nafnabreytingunni hafa stofnað samtökin: "City Till We Die." Allam sendir þeim kaldar kveðjur.

"Þeir mega deyja sem fyrst ef þeir vilja. Bara á meðan þeir hætta afskiptum af félaginu því meirihlutinn vill bara sjá góðan fótbolta. Hvernig geta þeir kallað sig stuðningsmenn? Þessar fótboltabullur, þessi háværi minnihluti."