Gerrard gaf barnaspítala 96 milljónir króna

Sælla er að gefa en þiggja. Þessi orð hafði Steven Gerrard, fyrirliði Liverpool, að leiðarljósi er hann ákvað að styrkja barnaspítala í Liverpool á myndarlegan hátt.

Gerrard styrkti spítalann um tæpar 97 milljónir króna. Peningarnir koma úr styrktarsjóði hans. Leikmaðurinn fékk góðgerðarleik hjá Liverpool og þeir peningar renna inn í spítalann.

Spítalinn heitir Alder Hey og sinnir um 200 þúsund börnum á hverju ári. Hann hefur alltaf notið góðs stuðnings frá knattspyrnufélögunum í Liverpool.

"Það eru forréttindi að fá að hjálpa þessum spítala. Allir sem mættu á góðgerðarleikinn og styrktu þetta verkefni vita að peningur þeirra fór í verðugt málefni," sagði Gerrard.