Beckham mjakast nær markmiði sínu

David Beckham hefur fengið leyfi yfirvalda í Miami-Dade sýslu í Bandaríkjunum til að reisa knattspyrnuleikvang.

Beckham hefur í huga að koma á fót knattspyrnufélagi í Miami sem myndi keppa í MLS-deildinni bandarísku. Hann hætti sjálfur knattspyrnuiðkun í lok síðasta tímabils eftir að hafa verið á mála hjá PSG í Frakklandi í nokkra mánuði.

Hann lék lengi vel með LA Galaxy í MLS-deildinni og þekkir því vel til. Nú stendur yfir leit að hentugum stað fyrir leikvanginn og eru Beckham og félagar helst að horfa til miðborgar Miami.

Don Garber, yfirmaður MLS-deildarinnar, segir að vinnunni miði vel en að það sé lykilatriði að velja nýju liði góðan stað fyrir sinn leikvang.