Kompany frá í þrjár vikur til viðbótar

Vincent Kompany, fyrirliði Manchester City, verður frá í það minnsta í þrjár vikur til viðbótar vegna meiðsla á læri.

Belginn hefur nú misst af síðustu sjö leikjum liðsins eftir að hafa orðið fyrir meiðslunum í 3-1 sigri liðsins á Everton í síðasta mánuði.

Upphaflega átti leikmaðurinn aðeins að vera frá í þrjá vikur en núna verður fjarvera hans nær tveimur mánuðum sem er gríðarleg blóðtaka fyrir Manchester City en varnarleikur liðsins hefur ekki verið nægilega öflugur undanfarnar vikur.

„Ég held að Vincent verði frá í þrjá vikur til viðbótar,“ sagði Messchalck, yfirlæknir Man. City, í viðtali við Sky Sports News.

„Það verður lögð mikil áhersla á að hann komi fullfrískur til baka og því þarf hann lengri tíma.“