Jones ætlar að festa sig í sessi sem miðvörður

Hinn fjölhæfi leikmaður Man. Utd, Phil Jones, segist helst vilja spila sem miðvörður fyrir félagið en hann hefur verið notaður út um allan völl.

Hinn 21 árs gamli Jones kom frá Blackburn árið 2011 og hefur leyst margar stöður með miklum sóma síðan. Þar á meðal á miðjunni og sem bakvörður.

Sir Alex Ferguson sagði undir lok síðasta tímabils að Jones hefði alla burði til þess að verða einn besti leikmaður í sögu félagsins.

"Þessi ummæli komu mér mjög á óvart en ég var upp með mér. Sérstaklega þar sem þetta kom frá Sir Alex. Það eru engar smá goðsagnir sem hafa spilað fyrir þetta félag," sagði Jones.

"Ég mun ekki gleyma þessu og leggja mig allan fram við að standa undir þessum væntingum. Mér líður best í miðvarðarstöðunni og þar vil ég helst spila. Það var alltaf markmiðið að koma mér í liðið sem miðvörður og vonandi gengur það upp í vetur."