Mikil leit gerð að byssumanni í París

Umfangsmikil leit er nú gerð að manni sem skaut á skrifstofur dagblaðsins Liberation og hleypti einnig af byssunni fyrir framan höfuðstöðvar stórbankans Societe Generale í París. Tuttugu og sjö ára gamall ljósmyndari slasaðist alvarlega í árásinni.

Eftir það fór maðurinn inn í bíl fyrir utan og skipaði ökumanninum að keyra sig að Champs Elysees  breiðgötunni. Hann mun hafa sagt ökumanninum að hann væri vel vopnaður og með handprengjur í fórum sínum. Lögregla telur að um sama mann sé að ræða og braust inn á skrifstofur sjónvarpsstöðvar á föstudag og hóf þar skothríð án þess þó að slasa neinn.

Lögregluvörður er nú við alla helstu fjölmiðla Parísarborgar en ekkert er enn vitað um ástæður árásanna.