LeBron vill eignast hlut í fótboltaliði Beckham

Eins og fram hefur komið þá ætlar David Beckham að setja á fót lið í MLS-deildinni frá Miami. Mikill áhugi er á þessu verkefni Englendingsins.

Besti körfuboltamaður heims, LeBron James, er í viðræðum við Beckham um að eignast hlut í félaginu. James spilar fyrir körfuboltalið borgarinnar en það hefur unnið NBA-meistaratitilinn síðustu tvö ár.

"Við David erum orðnir góðir vinir og höfum áhuga á því að vinna saman," sagði James en hann á einnig lítinn hlut í Liverpool. "Ég er búinn að læra um íþróttina og veit núna nákvæmlega hvað er í gangi hverju sinni á vellinum."

Beckham er spenntur fyrir verkefninu.

"Ég held að Miami sé frábær borg fyrir fótboltalið. Það er mikið af ungum leikmönnum hérna og stemning fyrir fótbolta," sagði Beckham.