Fjörutíu prósent Sýrlendinga eru hjálparþurfi

Rúmlega níu milljónir Sýrlendinga, eða um fjörutíu prósent landsmanna, þurfa nú nauðsynlega á utanaðkomandi hjálparaðstoð að halda. Þetta fullyrðir yfirmaður mannréttindamála hjá Sameinuðu þjóðunum, Valerie Amos.

Ekkert lát er á borgarastríðinu í landinu og hefur tala þeirra sem eru í neyð hækkað snarlega, eða um tvær komma fimm milljónir manna frá því Sameinuðu þjóðirnar lögðu síðast mat á vandann í september.

Sérlegur sáttasemjari í deilunni, Lakhdar Brahimi ætlar að funda í dag með Bandaríkjamönnum og Rússum og freista þess að ná sátt um fyrirkomulag friðarviðræðna sem til stendur að halda í Genf í Sviss þegar um þær næst samkomulag.