Van Persie sá um Arsenal

Manchester United stöðvaði gott gengi Arsenal með 1-0 sigri á Old Trafford í dag.Robin Van Persie skoraði sigurmark Manchester United gegn sínum gömlu félögum en þetta er þriðji leikurinn í röð gegn Arsenal sem Van Persie skorar í.

Eftir slæmt tap í fyrstu umferð gegn Aston Villa á heimavelli höfðu leikmenn Arsenal nælt í 25 af síðustu 27 stigum í deildinni og komu því fullir sjálfstrausts inn í leikinn í dag.  Með sigri í dag hefði Arsenal getað náð 11 stiga forskoti á United.

Heimamenn voru mun ákafari í fyrri hálfleik og náðu sanngjarnt forskotinu um miðbik fyrri hálfleiks. Þá átti Wayne Rooney hornspyrnu sem rataði beint á Robin Van Persie sem sendi boltann í fjærhornið með öxlinni.

Arsene Wenger reyndi að auka pressuna í seinni hálfleik og færði liðið framar á völlinn en gekk illa að skapa sér markverð færi og hafði David De Gea það nokkuð náðugt í dag.

Heimamenn héldu út leikinn og unnu að lokum gríðarlega mikilvægan sigur sem gefur liðinu ekki aðeins þrjú stig heldur hellings sjálfstraust fyrir verkefnin sem eru framundan.