Charlie Adam jafnaði úr víti á fimmtu mínútu í uppbótartíma

Wilfried Bony skoraði tvö mörk fyrir Swansea í kvöld en það dugði þó ekki Swansea til sigurs því Charlie Adam tryggði Stoke 3-3 jafntefli með marki úr vítaspyrnu á fimmtu mínútu ú uppbótartíma. Swansea komst yfir í 3-2 eftir að Stoke hafi komið í 2-0 í fyrri hálfleik.

Þetta var aðeins þriðja stig Stoke-liðsins í síðustu sjö deildarleikjum en liðið er án sigurs í átta deildarleikjum í röð. Stoke gat hinsvegar þakkað fyrir að fá eitt stig því jöfnunarmarkið kom ekki fyrr en á allra síðustu stundu.

Það leit út fyrir að Stoke væri að fara vinna langþráðan sigur í ensku deildinni þegar Jonathan Walters og Stephen Ireland komu liðinu í 2-0 á fyrstu 25 mínútum leiksins. Peter Crouch lagði upp bæði mörkin.

Swansea-liðið gafst ekki upp og snéri leiknum við í seinni hálfleiknum. Wilfried Bony skoraði fyrsta markið með skalla á 55. mínútu eftir sendingu Jonathan de Guzmán.

Nathan Dyer jafnaði metin á 74. mínútu og  Wilfried Bony skoraði sigurmarkið á 86. mínútu eftir flottan undirbúning Jonjo Shelvey.

Stoke-liðið átti hinsvegar lokaorðið og Charlie Adam jafnaði úr vítaspyrnu á fimmtu mínútu í uppbótartíma en það var dæmt fyrir hendi á varnarmann Swansea.