Reyna að fá uppreisnarmenn til að mæta til friðarviðræðna

Utanríkisráðherrar vesturveldanna og nokkurra arabaríkja hitta forsvarsmenn Sýrlenskra uppreisnarmanna á fundi í London í dag til þess að reyna að sannfæra þá um að mæta til friðarviðræðna sem halda átti í Sviss í næsta mánuði.

Uppreisnarmenn segjast ekki hafa neitt að ræða við Al-Assad forseta og menn hans, eini möguleikinn á friðarviðræðum væri sá að Assad myndi fara frá. Forsetinn stendur hinsvegar keikur, þrátt fyrir hið blóðuga borgarastríð sem nú geisar í landinu og í viðtali við Líbanska sjónvarpsstöð í gær sagðist hann ekki gera ráð fyrir öðru en að hann muni bjóða sig fram til endurkjörs í forsetakosningum sem til standi að halda á næsta ári.