Fallhlífarstökkvari í kröppum dansi

Myndband náðist af því þegar fallhlífarstökkvari lenti í kröppum dansi í mikilli hæð yfir Bretlandi. James Dobb var við það að stökkva úr þyrlu þegar fallhlíf hans opnaðist of snemma og flæktist í þyrlunni. Litlu munaði að fallhlífin færi í stélhreyfil þyrlunnar, en James náði að skera fallhlífina frá sér og stökk svo einungis með varafallhlíf.

Frá þessu er sagt á vef Daily Mail. Þó James hafi náð að stökkva var áfram mikil hætta en þeir sem voru eftir í þyrlunni þurftu að losa fallhlífina og ná henni aftur um borð í þyrluna áður en hún flæktist í hreyfilinn. Á endanum tókst þeim að ná fallhlífinni inn, en það verður að viðurkennast að ekki mátti miklu muna svo stórslys yrði.

Útbúnaðurinn sem James notaðist við var leigður svo hann vissi ekki hver hafði pakkað fallhlífinni né hvernig. Hann segir snarræði starfsmannanna í þyrlunni hafa valdið því að honum var mögulegt að skera fallhlífina lausa.