Segir yfirvöld sverta mannorð Tíbeta sem hafa kveikt í sér

Fjölskylda Tíbeta, sem kveikti í sjálfum sér í október árið 2012, hefur mátt sæta ásökunum lögreglu um að hafa hagnast á dauða hans.

Frændi mannsins segir ekkert hæft í þessum áburði yfirvalda.

„Miklu hefur verið logið um Sangay Gaytso og aðra sem hafa kveikt í sjálfum sér,” segir frændinn, sem ekki vill láta nafns síns getið af ótta við hefndaraðgerðir yfirvalda. 

Sangay Gaytso var 27 ára þegar hann kveikti í sér þann 6. október árið 2012. Þetta gerði hann til að mótmæla því ranglæti, sem tíbetska þjóðin hefur mátt þola af hálfu kínverskra yfirvalda á undanförnum áratugum.

Stuttu eftir að hann lést kom lögreglan heim til fjölskyldu hans, spurði undarlegra spurninga og virtist vera með svörin á reiðum höndum: Var ekki búið að skipuleggja sjálfsíkveikjuna fyrirfram? Var hann ekki í tengslum við tíbetska aðskilnaðarsinna í öðrum löndum? Fékk fjölskyldan ekki greiddar þrjár milljónir júana fyrir þessa mótmælaaðgerð?

Yfirvöldin héldu því fram að Gaytso hafi verið óforbetranlegur þjófur og kvennabósi. Honum hafi verið att út í að kveikja í sjálfum sér í þeim tilgangi að kynda undir þjóðernishatur meðal Tíbeta í garð Kínverja.

„Þetta var allt saman tóm vitleysa,” segir frændinn í viðtali við AP fréttastofuna. Sjaldgæft er að fjölmiðlar fái tækifæri til að ræða eftirlitslaust við íbúa í Tíbet, sem Kínverjar innlimuðu árið 1951.

Frá árinu 2009 hafa meira en 120 Tíbetar gripið til þessa örþrifaráðs, að kveikja í sjálfum sér til að vekja athygli á mannréttindabrotum gagnvart Tíbetum. 

Þeir sem þetta gera hafa ýmist komið úr röðum munka eða almennings, karlar jafnt sem konur og á ýmsum aldri.