Barkat endurkjörinn í Jerúsalem

Avigdor Lieberman, utanríkisráðherra Ísraels, og Arijeh Deri, leiðtogi Shas-flokksins, börðust hart gegn því að Nir Barkat yrði endurkjörinn borgarstjóri í Jerúsalem.

Þeir tefldu fram lítt reyndum frambjóðanda, Moshe Lion, sem á endanum fékk þó aðeins 45 prósent atkvæða.

Barkat sigraði naumlega með 51 prósenti, en kosningaþátttakan var reyndar harla dræm: Einungis 36 prósent mættu á kjörstað í gær.

Barkat var fyrst kosinn borgarstjóri árið 2008, en sigur hans þá þótti töluvert áfall fyrir strangtrúaða gyðinga, sem höfðu lengi farið með völd í borginni.

Barkat hafði áður stundað viðskipti í hátæknigeiranum, og þykir að mörgu leyti hafa staðið sig vel í starfinu. Hann hefur lagt áherslu á að efla efnahag borgarinnar með því að ýta undir ferðamennsku og menningarstarfsemi. Honum tókst með þessu að stöðva brottflutning veraldlegra sinnaðra íbúa.

Á hinn bóginn hefur hann verið gagnrýndur fyrir að vanrækja arabíska íbúa í austurhluta borgarinnar en vera eftirlátssamur við landtökumenn, sem hafa hirt húsnæði og lóðir af Palestínumönnum.

Arabískir íbúar borgarinnar eru nógu margir til að geta, ef þeir vilja, haft mikil áhrif á útkomu kosninganna. Þeir kusu hins vegar, eins og í fyrri kosningum, að taka ekki þátt í mótmælaskyni við stjórn Ísraela á borginni.

Ísraelsk stjórnvöld vilja líta svo á að Jerúsalem sé höfuðborg Ísraels, þótt það sé ekki viðurkennt í alþjóðalögum.

„Á meðan ég er forsætisráðherra verður Jerúsalem sameinuð höfuðborg okkar. Þannig verður það,” sagði Benjamín Netanjahú forsætisráðherra, sem er fyrrverandi borgarstjóri í Jerúsalem, þegar hann greiddi atkvæði í borgarstjórakosningunum í gær.