Frjósemispróf karla komin á markað

Breskir karlmenn geta nú framkvæmt frjósemispróf heima hjá sér en um helgina setti lyfjaverslunin Boots slík próf í sölu í verslunum sínum. Frá þessu greinir vefsíða Sky News. 

Frjósemisprófið tekur um það bil tíu mínútur og reiknar það út hvort fjöldi sæðisfrumna sé í eðlilegu hlutfalli eða ekki. Prófið, sem hannað er í Bandaríkjunum, líkist einna helst þungunarprófum kvenna og er nákvæmni þess 98%. Prófið mælir hins vegar ekki heilbrigði sæðisins. 

Eitt af hverjum sex pörum í Bretlandi eiga í erfiðleikum með getnað.