Óveður í Skandinavíu: 2 látnir í Danmörku

Mikið er að gera á bráðamóttökum í Danmörku vegna ofsaveðursins sem geysar nú um Skandinavíu. Í dag mældist vindhraðinn 54 metrar á sekúndu. Aldrei hefur mælst meiri vindhraði þar í landi.

Að minnsta kosti tveir hafa látist vegna veðursins þar í landi og fjölmargir alvarlega slasaðir. Maður frá Kósóvó lést er húsgafl fauk á hann. Á vefsíðu Politiken kemur fram að maðurinn, sem er 21 árs, hafi virt að vettugi aðvaranir fjölskyldumeðlima sinna og farið út í óveðrið til þess að taka myndir. Annar maður lést þegar tré féll á hann. Þetta er ekki eina dæmið í Evrópu um dauðsfall af völdum trés sem rifnað hefur upp með rótum vegna fárviðrisins. Tvær manneskjur létust í Þýskalandi þegar tré féll á bíl þeirra, kona í Amsterdam varð einnig fyrir því að tré féll á hana og húsbátur í sömu borg sökk er vindurinn feykti þungum trjástofni ofan á þak hans.

Dönsk kona á sextugsaldri slasaðist alvarlega þegar hún festist undir þaki sem losnað hafði í veðrinu. 1500 manns sitja fastir í lestum víðsvegar um Danmörku sem komast hvorki lönd né strönd vegna veðurs. Unnið er í því að koma farþegunum til síns heima og gengur starfið sæmilega en fyrir rúmlega tveimur tímum voru þeir alls 5000 talsins. Lestarsamgöngur um Fjón og Sjáland munu liggja niðri þangað til fjögur í nótt. 

Áttatíu þúsund heimili í Svíþjóð eru nú án rafmagns og hefur lögregla skipað fólki að halda sig heima við. Veðrið hefur velt byggingarpöllum og bátum um koll svo fátt eitt sé nefnt.

Hér má sjá myndir frá Danmörku.