Virðast gruna Úígúra um hryðjuverk í Peking

Kínverska lögreglan er að afla sér upplýsinga um tvo Úígúra í tengslum við rannsókn á atviki, sem varð í gær á Torgi hins himneska friðar (Tiananmen-torgi) í Peking, þegar bifreið var ekið inn í mannfjöldann með þeim afleiðingum að fimm manns létust og 38 slösuðust.

Mennirnir eru taldir vera Úígúrar, en Úígúrar eru minnihlutaþjóð í Kína, búsettir að mestu í norðvestanverðum hluta landsins. 

Ekki er vitað hvort lögreglan telur að Úígúrarnir tveir hafi verið í bifreiðinni, sem ekið var á mannfjöldann, en þrír þeirra fimm sem létu lífið voru í bifreiðinni.

Yfirvöld hafa ekki birt neinar upplýsingar um rannsókn málsins, en torgið í Peking er einn þekktasti staður Kína. Þar er Forboðna borgin, hinn forni bústaður keisarans í Kína, reist á fimmtándu öld.

Þar er jafnan krökkt af ferðamönnum og öryggisverðir sömuleiðis á hverju strái.

Á torginu blasir við stór mynd af Maó formanni, en torgið er jafnframt viðkvæmt fyrir kínversk stjórnvöld vegna atburðanna sem urðu þar árið 1989, þegar hernum var sigað á hóp ungra mótmælenda sem kröfðust lýðræðisumbóta.

Úígúrar eru múslimar, en meðal þeirra eru herskáir aðskilnaðarsinnar sem áratugum saman hafa barist gegn yfirráðum Han-Kínverja í Xinjiang-héraði.