Ormar í indverskri samloku

Indverska flugfélagið Air India segir að rannsókn sé hafin á því hversvegna ormar hafi fundist í samloku farþega sem flaug með félaginu í síðasta mánuði.

Farþeginn fann ormana þegar hann var á leið frá New York til Nýju-Delí þann 28. september síðastliðinn. Hann sagði flugfreyjunum frá ormunum, en fékk ekkert svar frá félaginu næstu tvær vikur.

Talsmaður flugfélagsins segir að miklar kröfur séu til hreinlætis í eldhúsi flugvéla félagsins, en tilvikið verði þó rannsakað í þaula.

Air India á í töluverðum erfiðleikum fjárhagslega og er þetta enn eitt hneykslið á stuttum tíma.

Í maí var vél félagsins, sem var á leiðinni til Bangalore, beint til annarar borgar eftir að flugmaðurinn kom að lokuðum flugstjórnarklefa eftir klósettferð. Það þykir ekki standast öryggiskröfur flugmálayfirvalda.

Þá var annar flugmaður rekinn á dögunum eftir að alkóhól fannst í blóði hans í reglubundinni skoðun fyrir flug.