Þörf fyrir mataraðstoð stóraukist í Bretlandi

Síðasta hálfa árið hafa nærri 356 þúsund manns hafa þurft á matargjöfum að halda í Bretlandi frá The Russel Trust, kristilegum samtökum sem sinna sjálfboðastarfi.

Þetta er nokkru fleira fólk en þurfti á mataraðstoð að halda allt árið þar á undan.

Chris Mould, framkvæmdastjóri samtakanna, hvetur stjórn David Camerons til að láta rannsaka orsakir þess, að fólk sveltur í Bretlandi. Hann segir ástandið eiga eftir að versna í vetur.

„Þetta vekur áhyggjur,” hefur fréttastofan AP eftir Mould. „Þetta ástand er ekkert að fara. Það fer versnandi.”

Mould segir að kaupmáttur fólks hafi minnkað töluvert frá því kreppan hófst árin 2007 til 2008. Brýnustu nauðsynjar hafi hækkað í verði en tekjur ekki vaxið að sama skapi. Nú sé svo komið að margir þurfi að velja á milli þess í vetur hvort mikilvægara sé að verja takmörkuðu fé sínu til að hita húsnæðið eða til að kaupa sér mat.

„Fólk er byrjað að skila mat sem þarf að elda vegna þess að það hefur ekki efni á því að nota rafmagnið,” segir Mould.

Hann segir að sparnaðaraðgerðir ríkisstjórnar Íhaldsflokksins og Frjálslyndra síðustu ár hafi orðið til þess að staða hinna verst settu hafi versnað enn.

George Osborne fjármálaráðherra hefur viðurkennt að aðhaldsaðgerðir hafi reynst fólki erfiðar, en segir þær nauðsynlegar til skamms tíma. Efnahagsbatinn hafi hins vegar látið bíða lengur eftir sér en vonast var til.