Var látin mynda meðvitundarlausan viðskiptavin

Fyrrverandi starfsstúlka á veitingastaðnum Heart Attack Grill í Las Vegas segir þennan víðfræga stað dapurlegan og ófagmannlegan vinnustað. Hún svaraði spurningum á beinni línu á vefsíðunni Reddit í gær og vandaði staðnum ekki kveðjurnar.

Heart Attack Grill, eða Hjartaáfallsgrillið eins og það gæti kallast á íslensku, hefur verið gagnrýnt harðlega fyrir matseðilinn en á honum er meðal annars að finna hinn alræmda Quadruple Bypass-borgara en hann inniheldur hvorki meira né minna en 10 þúsund hitaeiningar. Þá þurfa þeir sem eru þyngri en 160 kíló ekki að borga fyrir matinn sinn.

Stúlkan, sem sjálf segist vera grænmetisæta, segist hafa fundið til sektarkenndar þegar fólk í mikilli ofþyngd kom á staðinn til að fá frítt að borða. „Á hverjum degi komu fimm til tíu manns sem uppfylltu kröfur staðarins um ókeypis máltíð. Og þá leið mér illa yfir því að stuðla að slæmu heilsufari þeirra.“

Hún lýsir því þegar framkvæmdastjóri staðarins lét hana taka myndband af viðskiptavini sem misst hafði meðvitund til þess að senda á fjölmiðla, en staðurinn er þekktur fyrir að taka slæmri umfjöllun fagnandi. Til dæmis var sagt frá því á dögunum þegar stofnandi staðarins, Joe Basso, mætti í sjónvarpsútsendingu með ösku í poka. Askan var í raun líkamsleifar viðskiptavinar sem dáið hafði á staðnum.

Í yfirlýsingu frá Basso segir hann starfsstúlkuna fyrrverandi vera athyglissjúka og segir hana hafa verið lélegan starfskraft. Hún hafi aldrei reynt að vingast við samstarfsfólk sitt og viðskiptavinir hafi kvartað undan viðmóti hennar.