ESB tilbúið til að halda viðræðum áfram

„Okkar megin höfum við ekki dregið okkur í hlé,” sagði Stefan Füle, stækkunarstjóri Evróupsambandsins, þegar hann kynnti stöðuna í stækkunarmálum sambandsins á Evrópuþinginu í morgun.

Hann sagði Evrópusambandið hvenær sem er reiðubúið til að halda áfram aðildarviðræðum við Ísland, kjósi Íslendingar það: „Og ég er enn sannfærður um að við gætum náð niðurstöðu sem yrði öllum aðilum til hagsbóta og jákvæð.”

Í skýrslunni er fjallað um stöðu aðildarviðræðna við þau átta ríki, sem ESB hefur átt í viðræðum við um aðild. Auk Íslands eru þetta Tyrkland og Balkanskagaríkin Albanía, Bosnía og Hersegóvína, Kosovó, Makedónía, Serbía og Svartfjallaland.

Ísland er eina ríkið, sem hefur frestað viðræðum en í skýrslunni er skýrt tekið fram að samskiptin við Ísland verði Evrópusambandinu áfram mikilvæg.

„Ísland var langt komið í aðildarviðræðum þegar nýja stjornin ákvað að fresta viðræðunum, og aðildarferlið hefur stöðvast,” segir í skýrslunni. 

Framkvæmdastjórnin hafi hins vegar frestað öllum áformum um greiðslur IPA-styrkja til Íslands. 

Hér að neðan má heyra hvað Füle hafði að segja um Ísland í morgun.