Þrjátíu milljónir manna búa við þrældóm

Næstum þrjátíu milljónir manna um allan heim búa við þrældóm, að því er fram kemur í nýrri rannsókn sem náði til 162 landa.

Verst er ástandið á Indlandi þar sem álitið er að fólk í þrældómi telji um fjórtán milljónir. Hlutfallslega eru þrælar þó flestir í Máritaníu, eða fjögur prósent landsmanna.

Það voru áströlsku mannréttindasamtökin Walk Free Foundation sem gerðu rannsóknina en með nútíma þrælahaldi er átt við fólk sem er ofurskuldsett einhverjum öðrum, hefur verið þvingað í hjónaband gegn vilja sínum eða lent í mansali. Á eftir Indlandi á listanum yfir þjóðir með marga þræla koma svo Kína með tæpar þrjár milljónir og Pakistan með rúmar tvær. BBC greinir meðal annars frá þessu.

Samkvæmt rannsókninni er áætlað að þrælahald tíðkist helst á Indlandi og þá kemur Kína:

Indland - 13,956,010

Kína - 2,949,243

Pakistan - 2,127,132

Nígeria - 701,032

Eþíópía - 651,110

Rússland - 516,217

Tæland - 472,811

Kongó - 462,327

Búrma - 384,037

Bangladesh - 343,192