Ráðgera friðarráðstefnu um Sýrland í næsta mánuði

Ráðstefna til að finna pólitíska lausn á borgarastyrjöldinni í Sýrlandi verður haldin í Genf í Sviss, dagana 23. og 24. nóvember. Qadri Jamil, varaforsætisráðherra Sýrlands, staðfesti þetta í samtali við fjölmiðla í Moskvu í morgun.

Þrátt fyrir þessa yfirlýsingu er óvíst hvort nokkuð verði af þessum viðræðum, sem Bandaríkin og Rússland hafa þrýst á um, þar sem margir uppreisnarhópar, vilja ekki heyra á það minnst að semja við Bashar al-Assad Sýrlandsforseta og stjórn hans. Á meðan hafa stjórnvöld hafnað því að semja við vopnaða uppreisnarhópa.

Á meðan geysa átök enn í Sýrlandi, þar sem á annað hundrað þúsunda manna hafa fallið frá því að átök hófust fyrir hálfu þriðja ári og um sjö milljónir manna hafa hrakist frá heimilum sínum.

Í morgun tilkynnti Sky News í Arabíu að fréttateymi á þeirra vegum hefði horfið í borginni Aleppó. Ekkert hefur spurst til þriggja manna, fréttamanns frá Máretaníu, tökumanns frá Líbanon og Sýrlenskum bílstjóra, frá því á þriðjudagsmorgun.

Sýrland er hættulegasta land í heimi fyrir fjölmiðlafólk þar sem tugum fréttafólks hefur verið rænt og yfir 25 hafa fallið á meðan stríðinu hefur staðið.