WHO: Loftmengun veldur krabbameini

Loftmengun veldur lungnakrabbameini. Þetta kemur fram í yfirlýsingu frá Alþjóðlegu krabbameinsrannsóknastofnuninni (IARC) í dag, en það er undirstofnun Alþjóðaheilbrigðisstofnunarinnar (WHO). Þessi yfirlýsing byggir á rúmlega 1.000 rannsóknum sem gerðar hafa verið.

Ákveðin efni í loftmengun, til dæmis útblástur díselvéla, hafa áður verið flokkuð sem krabbameinsvaldandi, en þetta er í fyrsta sinn sem loftmengun í heild sinni hefur sett í þennan flokk. Samkvæmt yfirlýsingunni er loftmengun nú í sama hópi og asbest, tóbaksreykur og útfjólublá geislun.



Áður hafði einnig verið sannað að loftmengun auki líkur á hjarta- og öndunarfærasjúkdómum.

„Við lítum svo á að þetta sé einn helsti valdur krabbameins í umhverfi fólks og loftmengun taki jafnvel óbeinum reykingum fram í þeim efnum,“ segir Kurt Straif,  yfirmaður greiningardeildar IARC.

Hann bætir því við að það sé mjög erfitt að forðast loftmengun, þar sem hún komi alls staðar að. WHO og Framkvæmdastjórn ESB vinna nú að endurskoðun laga um takmörkun á loftmengun.

Yfir 220.000 dauðsföll á heimsvísu, voru rakin til loftmengunar árið 2010. Vísindamenn eru nú að vinna að því að greina nánar hvaða efni í loftmengun séu líklegri en önnur til þess að valda krabbameini.