Óhugnalegar afleiðingar reykinga

Finnskir læknar hafa sett upp nýja gagnvirka síðu til að vekja athygli á hættum reykinga. Á síðunni má ýta á mismunandi líkamshluta til að fá birtar aukaverkanir sem hafa áhrif á þann tiltekna líkamshluta. Með því að smella á mynd af kven- eða karllíkama má sjá hvernig sama manneskjan lítur út reyklaus eða eftir margra ára reykingar. Þá má fræðast um að til dæmis geta reykingar gert konur gráhærðar, valdið andlitshárvexti hjá konum og hægt á sæðisframleiðslu karla.

Á síðunni er lögð áhersla á minna þekktar aukaverkanir. Sumar þeirra eru ansi truflandi. Meðal þess sem kemur fram er að graftarbólur geta orðið erfiðari viðureignar við reykingar, hætta á magasári eykst og blóðflæði versnar, sem veldur því að liturinn á húð reykingamanna getur breyst.

Reykingamenn sem hafa reykt pakka á dag í 25 ár fá fimm sinnum fleiri hrukkur en þeir sem hafa aldrei reykt.

Reykingar auka framleiðslu karlhormónsins testesteróns í konum sem veldur óvelkomnum hárvexti, meðal annars í andliti. Konur sem reykja pakka af sígarettum á dag eða meira eru töluvert líklegri en þeir sem ekki reykja til að fá andlitshár, byrja fyrr á breytingaskeiði og hafa óreglulegar blæðingar.

Reykingamenn eru líklegri til að safna fitu sem sest á magann. Stelpur á aldrinum 16-24 ára sem reykja eru líklegri en stelpur í sama aldurshópi sem reykja ekki til að vera í yfirþyngd.

Hár reykingamanna er viðkvæmt og þeir eru líklegri til að verða sköllóttir og gráhærðir en aðrir.

Reykingar auka hættuna á blóðtappa og kynlíf reykingamanna er verra en þeirra sem reykja ekki. Reykingar hægja á blóðflæði til getnaðarlims og af því leiðir að reykingamenn eru tvisvar sinnum líklegri en aðrir til að þjást af getuleysi.

Verkefnið var unnið í samstarfi við Krabbameinsfélag Finnlands.