Húskettir leggja undir sig japanska eyju

Fleiri kettir en menn búa á litlu eyjunni Tashirojima sem liggur austan við Japan. Þar búa aðeins um hundrað manns sem flestallir eru yfir sjötíu ára gamlir. Fyrir rúmlega hálfri öld bjuggu þó yfir þúsund íbúar á eyjunni og margir þeirra áttu ketti til þess að halda í skefjum fjölda músa. Á sama tíma og íbúum fækkaði fjölgaði köttunum óðum. Það mætti nú segja að þetta sé eyja sem stjórnað er af köttum. Þannig hefur þróunin verið svo lengi að heill menningarheimur hefur skapast í kringum kattafjöldann. Til dæmis eru reglur á eyjunni sem banna hundahald, það er kattahof og nokkrar kattalaga byggingar. Að auki heimsækir dýralæknir eyjuna af og til í því skyni að tryggja það að kettirnir haldist heilbrigðir.  

Önnur eyja varð nýverið sömu örlögum að bráð en sú liggur sunnan við Japan og kallast Aoshima. Þar búa aðeins 15 einstaklingar sem eru allir háaldraðir. Kettirnir þar fjölga sér hratt, ólíkt íbúunum, og hafa gert eyjuna að heimili sínu þrátt fyrir að hafa verið eigendalausir í margar kynslóðir. 

Myndirnar sem fylgja fréttinni voru settar á Twitter af notandanum Kolmetoista og hafa þær orsakað það að eyjurnar eru skyndilega farnar að draga að sér ferðamenn.