Vill hæli vegna loftslagsbreytinga

37 ára gamall maður frá Kiribati-eyjum flutti til Nýja-Sjálands fyrir sex árum ásamt eiginkonu sinni. Þau eiga nú þrjú börn, en maðurinn óskar eftir hæli á Nýja-Sjálandi vegna þeirrar hættu sem stafar af yfirvofandi hækkun yfirborðs sjávar í heimalandi hans.

Kiribati-eyjaklasinn í Suður-Kyrrahafi er eitt láglendasta ríki jarðar, en stjórnvöld á Nýja-Sjálandi hafa í tvígang vísað á bug þeim rökum hans, að hækkandi yfirborð sjávar geri það að verkum að of hættulegt yrði fyrir hann og fjölskyldu hans að flytja þangað.

Engu að síður ætlar Michael Kidd, lögmaður mannsins, að gera eina til raun til viðbótar fyrir dómstólum á Nýja-Sjálandi. Málflutningur hefst 16. október og víða verður fylgst grannt með framvindu réttarhaldanna, því niðurstaðan gæti haft mikið að segja fyrir aðra íbúa á Kiribati, og reyndar fyrir þá tugi milljóna manna sem búa á öðrum láglendsissvæðim víða um heim.

Lögfræðingar telja reyndar rökstuðninginn harla langsóttan, en Kidd er staðráðinn í að fara með málið eins langt og komist verður, og áfrýja til hæstaréttar gerist þess þörf.

Á Kiribati búa rúmlega hundrað þúsund manns. Þetta eru 33 eyjar nokkurn veginn miðja vegu milli Havaí og Ástralíu, en þær eru dreifðar yfir nokkuð stórt hafsvæði.

Tvær eyjanna eru þegar sokknar í sjó og veruleg hætta þykir á að á þegar líða tekur á öldina hverfi stór hluti mikilvægasta ræktarlands eyjanna undir sjó.

„Það er engin framtíð fyrir okkur ef við snúum aftur til Kiribati,” sagði maðurinn þegar hann fyrst fór fram á dvalarleyfi á Nýja-Sjálandi. „Sérstaklega fyrir börnin mín. Það er ekkert fyrir að gera þar," sagði hann ennfremur, samkvæmt eftirriti af málflutningi sem AP fréttastofan vitnar í.

Hann segir þar að stuttu fyrir aldamótin hafi mikill öldugangur byrjað að brjóta niður varnargarða við þorpið, sem þau bjuggu í. Ekkert holræsakerfi sé í þorpinu, þannig að fólk tók að veikjast af drykkjarvatninu. Þá eru engar hæðir í þorpinu eða nágrenni þess, þannig að fólkið komst ekkert þegar vatnið var farið að ná því í hné.



Samkvæmt nýrri skýrslu frá Loftslagsráðstefnu Sameinuðu þjóðanna, sem gefin var út nú á mánudag, teljast yfirgnæfandi líkur til þess að yfirborð sjávar hækki um allt að einn metra fyrir næstu aldamót.

Ef svo fer, þá sökkva Kiribati-eyjar að stærstum hluta í sjó.