Reyndi að smygla áfengi og sígarettum til Noregs í líkkistu

Tollverðir við Svinesund í Noregi eru ýmsu vanir þar sem þeir vakta landamærin milli Noregs og Svíþjóðar. Þar leggur fólk ýmislegt á sig til að flytja varning sem keyptur er erlendis á lægra verði en býðst heima við.

Í gær kom hins vegar til þeirra kasta svartur sendiferðabíll, merktur útfararstofu í Lettlandi. Ökumaðurinn sagðist vera með líkkistu innanborðs þar sem væru jarðneskar leifar norsks ríkisborgara sem væri á leið til föðurlandsins þar sem ætti að leggja hann til hinstu hvílu. Lagði ökumaður meðal annars fram skjöl því til staðfestingar.

Tollverði grunaði hins vegar að þar væri ekki allt eð felldu og renndu bílnum í gegnum þar til gert gegnumlýsingartæki og sannleikurinn kom í ljós.

Í hinni meintu líkkistu var að finna 2.000 sígarettupakka og 473 lítrar af áfengi.

„Þetta er í fyrsta skipti sem við komum upp um smygltilraun í líkkistu,“ hefur vefur Aftenposten eftir Wenche Fredriksen, sem er yfirmaður tollgæslunnar í Svinesund.

Bílstjórinn var handtekinn og yfirheyrður en enn hefur ekki verið ákveðið hvort hann muni sæta gæsluvarðhaldi í framhaldinu.