Múslimar á flótta undan búddamunkum

Skelfingu lostnir múslimar í Búrma hafa flúið út í skóg eftir ofbeldishrinu í gær, þegar búddamunkar og fylgjendur þeirra gengu berserksgang í þorpinu Thandwe.

Um 700 manns réðust inn í þorpið, sveiflandi sveðjum og settu eld að húsum. Múgurinn kveikti í tugum húsa og myrti 94 ára gamla konu í þorpinu, sem er í Rakhine-héraði í suðvestanverðu landinu.

Þessi nýja ofbeldishrina er í beinu framhaldi af svipuðum atburðum á síðasta ári.

Hópur róttækra búddamunka hefur alið á ótta og hatri gagnvart múslimum í suðvestanverðu landinu, með þeim afleiðingum að reglulega sýður upp úr.

Mannréttindasamtök segja stjórnvöld hafa lítið sem ekkert gert til að draga úr ofbeldinu og hatursáróðrinum.

Munkarnir hamra á því að menningu og siðum búddista stafi ógn af múslimum, sem eru um það bil fjögur prósent íbúa landsins.

Thein Sein forseti hélt til Rakhine-héraðs í gær, fljótlega eftir árásina á þorpið. Hann fordæmdi ofbeldið og hvetur til friðar.

Hann segir átök milli þjóðernis- og trúarhópa í landinu, og þá ekki eingöngu milli búddista og múslima, grafa undan lýðræðisumbótum og sverta ímynd landsins á alþjóðavettvangi.

Hann er nú á leiðinni til Thandwe, þorpsins sem varð fyrir árásinni á þriðjudag. Spenna ríkir þar enn í lofti, en allt er með kyrrum kjörum. Fjölmennt lið hers og lögreglu er þar til að sjá til þess að heimsókn forsetans gangi vel fyrir sig.

Átök hafa hins vegar verið í öðrum þorpum í nágreinninu og ekki að sjá að öryggissveitir hafi reynt að grípa þar inn í.