Berlusconi hafði ekki sitt fram

Enrico Letta, forsætisráðherra Ítalíu, getur andað léttar eftir að ríkisstjórn hans stóðst atlögu frá Silvio Berlusconi í morgun.

Berlusconi fékk ekki stuðning nógu margra sinna eigin flokksfélaga við áform sín um að fella stjórnina með því að draga flokk sinn út úr stjórnarsamstarfinu.

Berlusconi sneri því við blaðinu og tilkynnti að hann og flokkur hans myndu greiða atkvæði með stuðningsyfirlýsingu við stjórnina.

Ráðamenn víða í Evrópu anda sömuleiðis léttar, því fall stjórnarinnar hefði getað haft slæm áhrif á efnahag Ítalíu, sem hefur verið bágborinn vegna skuldakreppunnar undanfarin misseri. Það hefði getað komið fleiri evruríkjum í alvarlegan vanda enn á ný.

Ljóst þykir að Berlusconi hafi tekið áhættu með ákvörðun sinni um síðustu helgi, þegar hann fyrirskipaði fimm ráðherrum flokks síns að segja sig úr stjórninni.

Á föstudaginn má svo Berlusconi búast við enn einu áfallinu, þegar þingið tekur afstöðu til þess hvort hann verði hreinlega rekinn af þingi í samræmi við dómsúrskurð, sem bannar honum að gegna opinberu embætti næstu árin.