Franskir líffæraþjófar pyntaðir, myrtir og brenndir af heimamönnum á Madagascar

Tveir franskir menn voru myrtir af hópi heimamanna á Madagaskar í dag en samkvæmt fréttaveitunni AFP voru mennirnir grunaðir um að eiga þátt í morði og líffæraþjófnaði á átta ára dreng sem hvarf í gær.

Drengurinn fannst á strönd á ferðamannastaðnum Nosy Be Hell-Ville en þá var búið að skera úr honum tunguna og fjarlægja af honum getnaðarliminn.

Í kjölfarið hélt hópur fólks að lögreglustöð þar sem hinir grunuðu voru í haldi og höfðu þá á brott með sér. Lögregluyfirvöld á staðnum reyndu að halda aftur af múginum og að minnsta kosti einn lét lífið í átökunum og tveir særðust.

Múgurinn hafði mennina á brott en samkvæmt lögreglu viðurkenndu mennirnir undir pyntingum múgsins að hafa orðið drengnum að bana. Mennirnir voru síðan myrtir á ströndinni og brenndir.

Franska ræðisskrifstofan ráðleggur nú frönskum ríkisborgurum að hafa hægt um sig á svæðinu og fara ekki nálægt ströndum þar en lögregluyfirvöld á svæðinu telja að múgurinn leyti enn þriðja mannsins, læknis sem grunaður er um að hafa tekið þátt í ódæðinu.