Þjóðarsorg á Ítalíu

Þjóðarsorg hefur verið lýst yfir á Ítalíu í kjölfar hins mannskæða sjóslyss sem varð undan ströndum eyjunnar Lampedusa í gær.

Nú er talið ljóst að um þrjúhundruð manns hafi farist þegar bátur flóttamanna brann og sökk síðan um einn kílómetra frá ströndinni. Um fimmhundruð flóttamenn frá Afríku voru um borð í bátnum.

Hundrað og fimmtíu var bjargað en rúmlega hundrað lík hafa þegar fundist og rúmlega tvöhundruð er enn saknað. Að sögn Sameinuðu þjóðanna voru flestir flóttamannanna frá Erítreu en sumir frá Sómalíu.

Skipstjóri bátsins komst lífs af og hefur hann nú verið handtekinn. Sá er þrjátíu og fimm ára Túnismaður sem hafði verið sviptur landvistarleyfi sínu á Ítalíu í vor. Til að minnast þeirra sem fórust verður einnar mínútu þögn í öllum skólum á Ítalíu í dag.