Kærir fyrir gallað sæði

Dönsk kona hefur kært sæðisbanka fyrir gallaða vöru. Hún fékk gjafasæði árið 2008 frá Nordisk Cryobank og eignaðist dóttur.

Þetta kemur fram á vef TV2.

Dóttirin greindist við fæðingu með Neurofibromatosis 1 sem er alvarlegur erfðasjúkdómur sem einkennist af góðkynja bandvefsæxlum eða hnútum sem vaxa út frá taugaslíðrum. Sjúkdóminn erfði barnið frá sæðisgjafanum.

Fyrst þarf að fá úr því skorið hvort gjafasæði sé í reynd vara. Ef svo er, mun móðirin kæra sæðisbankann á grundvelli laga um ábyrgð seljenda á vörum sínum.

Forstjóri sæðisbankans segir ekki hafa verið mögulegt að greina sjúkdóminn hjá sæðisgjafanum og því beri bankinn ekki ábyrgð á gallanum.

Fjallað var nýlega um málið í fréttum DR og kom þá í ljós að sæðisbankinn beið í marga mánuði með að láta dönsk yfirvöld vita að einn af sæðisgjöfum bankans bæri þennan alvarlega sjúkdóm.