Háskólasjúkrahúsið í Osló kært fyrir brot á útlendingalögum

Á morgun hefjast réttarhöld í Osló þar sem stjórn háskólasjúkrahússins þar í borg og hjón eru kærð fyrir brot á útlendingalögum. Samkvæmt Aftenposten snýst málið um þrjár filippseyskar konur sem unnu sem sjúkraliðar á sjúkrahúsinu og fengu vinnuna í gegnum hjónin sem tóku þóknun fyrir.

Málið komst upp þegar konurnar töluðu um það við samstarfsmenn sína að þær væru að bugast undan lánum sem þær tóku til að geta greitt hjónunum.

Stjórn sjúkrahússins er talin meðsek í málinu fyrir að nýta milliliði til að útvega erlenda starfskrafta án þess að eftirlit væri með þeim og tryggja að ekki væri um misnotkun að ræða.

Brot á lögunum getur varðað allt að tveggja ára fangelsi.