Bóluefni gegn malaríu

Vonast er til þess að fyrsta bóluefnið gegn malaríu gæti orðið útbreitt í heiminum strax árið 2015.

Breskir miðlar greina frá því að stórstígar framfarir hafi verið gerðar í rannsóknum á slíku bóluefni en nú stendur yfir í Suður-Afríku ráðstefna um þennan illvíga sjúkdóm sem leggur um 660 þúsund manns að velli á hverju ári. Flest þeirra sem látast eru börn og herjar sjúkdómurinn aðallega í Afríku sunnan Sahara.

Það er breska lyfjafyrirtækið Glaxo Smith Kline sem framleiðir bóluefnið og ráðgerir að sækja um leyfi fyrir því á næsta ári. Fyrirtækið hefur ennfremur heitið því að selja lyfið rétt yfir kostnaðarverði, eða með fimm prósent álagningu, og að hagnaðurinn verði notaður til frekari rannsókna.